नांदा सौख्यभरे' ?

झी वाहिनीवर सुरू असलेल्या सुचित्रा बांदेकर प्रस्तुत 'नांदा सौख्यभरे' या मालिकेकडून खूप अपेक्षा होत्या. परंतु प्रत्यक्षात  सकस कथेचा अभाव असलेली ही रटाळ मालिका दिवसेंदिवस भरकटत आहे. अमेरिकेत शिक्षण घेऊन आलेल्या इंद्रनीलची हुशारी अजून तरी मालिकेत दिसून आलेली नाही. नात्यातील खरेपणाचे महत्त्व जपणारी स्वानंदी स्वतः मात्र संपदाला व्हिसा प्रकरण विनाकारण लपवायला सांगते. हट्टी संपदा तर प्रत्येक सीन मध्ये फक्त उच्छाद मांडताना दिसते. उत्कृष्ट विनोदी अभिनय करणारी सुहास परांजपे ही अभिनेत्री 'ललिता' हे खलनायकी पात्र साकारताना अजुनही चाचपडत आहे. बाकी इतर पुरूष कलाकार तर मालिकेत असून नसल्या सारखेच आहेत. कृपया निर्माता-दिग्दर्शकांनी मालिका ट्रॅक वर आणून वेळीच संपवावी.

मुलगीच दत्तक हवी

मुलगा वंशाचा दिवा’ या म्हणीप्रमाणे पूर्वी मुलगा दत्तक घेणाऱ्यांचे प्रमाण अधिक होते, परंतु सध्या हा समज मागे पडत चालला असून निपुत्रिक दाम्पत्यांचा कल मुलगी दत्तक घेण्याकडे वाढत असल्याचे दिसून येते. केंद्रीय दत्तविधान संस्थेकडून ( कारा ) आलेल्या अहवालानुसार देशात मुलांच्या तुलनेत ३६ टक्के मुलींना दत्तक घेण्याचे प्रमाण वाढले असल्याची माहिती समोर आली. त्यात मुलींना दत्तक घेण्याबाबत महाराष्ट्र राज्य अव्वल क्रमांकावर आहे ही खरोखरच समाधानकारक व कौतुकास्पद वास्तव आहे.   मुलगीच दत्तक हवी', असे सांगत महिनोन्‍महिने वेटिंग लिस्टवर थांबण्याची सामाजिक सुशिक्षित मानसिकता म्हणजे भावी सुसंस्कृत समाजाचे आशादायी चित्र म्हणायला हरकत नाही.

पाडगावकरांना श्रध्दांजली

अजरामर कविता आणि गीतांचे शिल्पकार कवीवर्य श्री मंगेश पाडगावकर यांचे अकल्पित निधन मनाला चटका लावणारे आहे. 'सांग सांग भोलानाथ' पासून ते 'प्रेम म्हणजे प्रेम म्हणजे प्रेम' पर्यंत त्यांच्या सर्व कविता, गाणी समस्त मराठी माणसांच्या मनात कायम रूंजी घालत राहतील. वयाच्या प्रत्येक टप्प्यावरील मानवी भाव भावनांचे मोती शब्दांच्या कोंदणात अलगद गुंफण्याची दैवी किमया अवगत असलेला हा कवी पुन्हा होणे नाही. त्यांच्या आत्म्यास शांती लाभो हिच ईश्वर चरणी प्रार्थना!

published in today's newspaper

दूरदर्शन च्या सुरवातीच्या काळात लहान मुलांसाठी मराठीत किलबील, गुजराथीत संताकुकडी, हिंदीत खेल खिलौने हा तर मॅजिक लॅम्प हा इंग्लिशमधुन कार्यक्रम असे. त्या शिवाय 'फन टाईम', 'विक्रम वेताळ', 'एक दोन तीन चार' या सारख्या खास बाल प्रेक्षकांसाठीच्या मालिका देखील कमालीच्या लोकप्रिय झाल्या होत्या. परंतु टिव्हीवर आज अहोरात्र सुरू असणारे असंख्य चॅनल्स असूनही लहान मुलांचे कार्यक्रम कोणत्याही वाहिनीवर सुरू नाहीत. बालविश्वावरील कार्यक्रम सुरू झाले तर प्रेक्षक त्यात्याही उपक्रमास चांगला टीआरपी मिळवून देतील यात शंका नाही.

होणार सुन मी.......!

होणार सुन मी या घरची' या मालिकेत दाखवण्यात आलेल्या बँकेचा कृपया आम्हाला पत्ता देण्यात यावा जिथे बँके कर्मचारी कार्यालयीन वेळेत कितीही वेळ घरगुती चर्चा करू शकतात. अगदी नातेवाईकापासुन ते नवीन चादरी, पडदे इत्यादींच्या खरेदी पर्यंत! भारतातील अशी कोणती बँके आहे जी अगदी सामसूम आहे आणि अगदी तुरळक कस्टमर्स आहेत आणि जिथे नातेवाईक कधीही येऊन भेटु शकतात. कामाची घाईगडबड तर अजिबात नाही. आज कोणत्याही बँक किंवा इतर ऑफिस मध्ये अशी परिस्थिती आढळून येत नाही. कृपया, संबंधित अधिकारी व चॅनेल नी या गोष्टींचा विचार करावा आणि अतार्किक व अवास्तव गोष्टी दाखवणे बंद कराव्यात.

#बायgoबाय रिव्ह्यू

नमस्कार, नवनवीन मराठी चित्रपटांच्या भाऊगर्दीत लक्षवेधक व हटके चित्रपट म्हणून नुकताच प्रदर्शित झालेला दिग्दर्शक विजय पगारे यांच्या 'बाय गो बाय' या चित्रपटाचा उल्लेख करावा लागेल. आजच्या काळात स्त्री-पुरूष समानता असली तरी खेडोपाडयात मात्र आजही पुरुषी वर्चस्व आढळून येते. असे असताना   बायकांचे वर्चस्व असलेल्या गावाची गोष्ट सांगणारा हा चित्रपट म्हणजे खरोखरच विनोदाची व धमाल करमणूकीची भेळ आहे. बैजाक्काच्या सशक्त भूमिकेत 'निर्मिती सावंत' यांनी आपले अभिनय कलागुण पुन्हा एकदा सिद्ध केले आहेत. संपूर्ण चित्रपटात भाव खाऊन जातो तो नायक 'नयन जाधव'! आतापर्यंत वेगवेगळ्या नाटक चित्रपटात सहाय्यक व्यक्तीरेखा साकारलेला 'नयन जाधव' यांनी नायक म्हणून आपल्या पहिल्याच चित्रपटात अभिनयाचे चौकार, षटकार ठोकले आहेत. त्यांचा विनोदी अभिनय बघताना आजच्या मराठी चित्रपट सृष्टीतील 'लक्ष्मीकांत बेर्डे' म्हणून त्यांचा उल्लेख करता येईल.

असंवेदनशील वृत्ती

शनिवारी लोकलट्रेन मधे गर्दीत तोल सांभाळू न शकल्यामुळे एका प्रवाशाचा झालेला मृत्यू सगळ्यांनाच चटका लावणारा आहे. या प्रवाशाची लोकलमध्ये शिरण्याचा प्रयत्न दाखवणारी व्हिडिओ क्लिप व्हायरल झाली व त्याची शेवटच्या क्षणापर्यंतची जगण्याची काळजाचे ठोके चुकवणारी धडपडही सर्वानी बघितली. यातील रेल्वे प्रशासनाची चुक किती, काय, पुढील काळात या बाबतीत उपाययोजना काय आहेत हा तर चर्चेचा विषय आहेच परंतु आश्चर्य वाटते ते सहप्रवाशांच्या वृत्तीचे! ज्या वेळी हा प्रवासी लोकांना मदतीचे आवाहन करत होता, लोकलच्या गर्दीत आत जागा देण्याची विनंती करत होता तेव्हा त्याच वेळी एक सहप्रवासी या प्रसंगाचे चित्रीकरण करत होता. हा सर्व प्रकार मन विषण्ण करणारा आहे. अशा वेळेचे चित्रीकरण करणार्‍यांची मानसिकता नक्की काय असते? हा असंवेदनशीलपणा किंवा अपघातग्रस्त, मृतांसोबत सेल्फी काढण्याचा प्रकार म्हणजे मानवी भावना बोथट झाल्याचे  एक भयंकर उदाहरण आहे.